പുത്തൻകുരിശ് ● ആകമാന സുറിയാനി ഓർത്തഡോക്സ് സഭയുടെ പരമാദ്ധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവ ഡിസംബർ 7 മുതൽ 17 വരെ സംസ്ഥാന സർക്കാരിന്റെ അതിഥിയായി മലങ്കര സന്ദർശിക്കും.

ഇതു സംബന്ധിച്ച് പൊതുഭരണ വകുപ്പ് സർക്കാർ അതിഥിയായി പരിഗണിച്ചു കൊണ്ടുള്ള ഉത്തരവിറക്കി. സുരക്ഷ ഒരുക്കുന്നതിന് ഡിജിപിയെ ചുമതലപ്പെടുത്തി. പുണ്യശ്ലോകനായ ശ്രേഷ്ഠ മോർ ബസ്സേലിയോസ് തോമസ് പ്രഥമൻ കാതോലിക്ക ബാവായുടെ 40-ാം ഓര്‍മ്മദിനത്തോടനുബന്ധിച്ചാണ് ശ്ലൈഹിക സന്ദർശനം. പരിശുദ്ധ ബാവായുടെ മലങ്കരയിലെ 5-ാം ശ്ലൈഹിക സന്ദർശനമാണിത്.

ഡിസംബർ 7 ന് രാവിലെ 9 മണിക്ക് എമിറേറ്റ്സ് വിമാനത്തിൽ നെടുമ്പാശ്ശേരി വിമാനത്താവളത്തിലെത്തുന്ന പരിശുദ്ധ ബാവായ്ക്ക് യാക്കോബായ സുറിയാനി സഭയുടെ നേതൃത്വത്തിൽ ഊഷ്‌മള സ്വീകരണം നൽകും. അന്ന് മലേക്കുരിശ് ദയറായിൽ താസിക്കുന്ന ബാവ 8-ാം തീയതി രാവിലെ 8 മണിക്ക് മലേക്കുരിശ് ദയറായിൽ വിശുദ്ധ കുർബ്ബാനയർപ്പിക്കും. തുടർന്ന് പുത്തൻകുരിശ് പാത്രിയർക്കാ സെന്ററിൽ എത്തി പരിശുദ്ധ എപ്പിസ്ക്കോപ്പൽ സുന്നഹദോസിൽ അധ്യക്ഷത വഹിക്കും. പുണ്യശ്ലോകനായ ശ്രേഷ്ഠ മോർ ബസ്സേലിയോസ് തോമസ് പ്രഥമൻ കാതോലിക്ക ബാവായുടെ കബറിൽ ധൂപാർപ്പണം നടത്തും.

9-ാം തീയതി രാവിലെ 8.30 ന് ശ്രേഷ്ഠ ബാവയുടെ 40-ാം ഓർമ്മ ദിനത്തിൽ പുത്തൻകുരിശ് സെന്റ് അത്തനേഷ്യസ് കത്തീഡ്രലിൽ പരിശുദ്ധ ബാവ വിശുദ്ധ കുർബ്ബാന അർപ്പിക്കും. തുടർന്ന് ഓർമ്മദിന ശുശ്രൂഷകളിൽ സംബന്ധിക്കും. പരിശുദ്ധ പിതാവ് 10-ാം തീയതി മുതൽ മഞ്ഞനിക്കര ദയറായിലായിരിക്കും. 17 നു രാവിലെ 9.50 നു നെടുമ്പാശ്ശേരിയിൽ നിന്നു മടങ്ങും.