പുത്തന്‍കുരിശ് ● യാക്കോബായ സുറിയാനി സഭയുടെ ബഹുഭൂരിപക്ഷം വിശ്വാസികളുള്ള ആറു പള്ളികൾ ന്യൂനപക്ഷമായ ഓർത്തഡോക്സ്‌ വിഭാഗത്തിന് സർക്കാർ ഏറ്റെടുത്ത് നൽകണമെന്ന ഹൈക്കോടതി ഉത്തരവ് സുപ്രീം കോടതി റദ്ദ് ചെയ്തത് യാക്കോബായ സുറിയാനി സഭയെ സംബന്ധിച്ച് വലിയ ആശ്വാസമാണെന്ന് മീഡിയാ സെൽ ചെയർമാൻ ഡോ. കുര്യാക്കോസ് തെയോഫിലോസ് മെത്രാപ്പോലീത്ത പറഞ്ഞു.

മത വിഭാഗങ്ങൾ തമ്മിലുളള തർക്കത്തിൽ ഹൈക്കോടതി നൽകുന്ന നിർദ്ദേശങ്ങൾ പൊതുതാത്പര്യത്തിന് യോജിച്ചതാണോ എന്ന് പരിശോധിക്കാനുള്ള സുപ്രീം കോടതിയുടെ നിർദ്ദേശവും സഭയ്ക്ക് പ്രതീക്ഷ നൽകുന്നതാണ്.

പോലിസ് സേന സംവിധാനങ്ങൾ ഉപയോഗിച്ച് ബലപ്രയോഗത്തിലൂടെ പള്ളികൾ ഏറ്റെടുക്കുന്നത് അഭികാമ്യമാണോ എന്ന് പരിശോധിക്കുവാനുള്ള സുപ്രീം കോടതിയുടെ ഉത്തരവ്, നാളിതു വരെയും പോലീസിനെ ഉപയോഗിച്ച് ബലപ്രയോഗത്തിലൂടെ യാക്കോബായ സഭയുടെ പള്ളികൾ കൈയേറിയതിന് വിരാമമിടുവാനുള്ള മുന്നറിയിപ്പായിട്ടാണ് യാക്കോബായ സഭ ഇതിനെ നോക്കിക്കാണുന്നത്.

സർക്കാരിന്റെ സെമിത്തേരി ബിൽ ശരി വച്ചു കൊണ്ടുള്ള സുപ്രീം കോടതിയുടെ പ്രത്യേക പരാമർശം മലങ്കര സഭാ തർക്കം നിയമ നിർമ്മാണത്തിലൂടെ ശാശ്വതമായി പരിഹരിക്കുവാൻ സർക്കാരിനുള്ളതായ സാധ്യതയും വർദ്ധിപ്പിക്കുന്നു. മലങ്കര സഭാ തർക്കം പ്രായോഗികമായി പരിഹരിക്കുവാൻ സർക്കാർ നടപടികളുമായി മുന്നോട്ട് പോകണമെന്നുള്ള സുപ്രീം കോടതിയുടെ പരാമർശം സെമിത്തേരി ബില്ലിലൂടെ മൃത സംസ്കാരം സംബന്ധിച്ച വിഷയങ്ങൾക്ക് പരിഹാരമുണ്ടാക്കിയതു പോലെ നിയമനിർമ്മാണത്തിലൂടെ മലങ്കര സഭാ തർക്കത്തിനും ശാശ്വത പരിഹാരമുണ്ടാക്കുവാനുള്ള സാധ്യതയായി സഭ ഇതിനെ കാണുന്നു.

മഴുവന്നൂർ പള്ളി സമർപ്പിച്ച എസ്.എൽ.പി. ഫയലിൽ സ്വീകരിച്ചതിലൂടെ 2017 ജൂലൈ 3 ൽ മൂന്നു പള്ളികൾക്ക് മാത്രം ബാധകമാകേണ്ട കോടതി വിധിയുടെ മറവിൽ യാക്കോബായ സഭയുടെ മറ്റു ദൈവാലയങ്ങൾ കൈയേറി കൊണ്ടിരിക്കുന്നതായ സ്ഥിതി വിശേഷം അവസാനിപ്പിക്കുവാനും ഓരോ പളളിയിലേയും കേസുകൾ വിശദമായി കേട്ട് വിധി കൽപ്പിക്കേണ്ടതായ സാഹചര്യവും ഇതിലൂടെ സംജാതമായിരിക്കുകയാണ് എന്നുള്ളത് സഭയെ സംബന്ധിച്ചിടത്തോളം സുപ്രധാനമാണെന്ന് മെത്രാപ്പോലീത്ത പറഞ്ഞു.

ഡോ. കുര്യാക്കോസ് തെയോഫിലോസ് മെത്രാപ്പോലീത്ത (മീഡിയാ സെൽ ചെയർമാൻ)

പുത്തൻകുരിശ്
പാത്രിയർക്കാ സെന്റർ