പുത്തന്‍കുരിശ് ● യാക്കോബായ സുറിയാനി സഭയുടെ ഭാഗ്യസ്മരണാര്‍ഹനായ ശ്രേഷ്ഠ മോര്‍ ബസ്സേലിയോസ് തോമസ് പ്രഥമന്‍ കാതോലിക്ക ബാവായുടെ ഒമ്പതാം ഓര്‍മ്മദിനമായ ഇന്ന് (നവംബർ 8 വെള്ളിയാഴ്ച) പുത്തന്‍കുരിശ് സെന്റ് അത്തനേഷ്യസ് കത്തീഡ്രലില്‍ രാവിലെ 6.30 ന് ആരംഭിച്ച വിശുദ്ധ കുര്‍ബ്ബാനയ്ക്ക് അഭിവന്ദ്യ ഐസക് മോര്‍ ഒസ്താത്തിയോസ് മെത്രാപ്പോലീത്ത പ്രധാന കാര്‍മികത്വവും, വന്ദ്യ വര്‍ഗ്ഗീസ് തെക്കേക്കര കോറെപ്പിസ്‌ക്കോപ്പ, റവ. ഫാ. മോവിന്‍ വര്‍ഗ്ഗീസ് എന്നിവര്‍ സഹകാര്‍മികത്വവും വഹിച്ചു. അഭി. ഏലിയാസ് മോര്‍ യൂലിയോസ്, അഭി. ഡോ. മാത്യൂസ് മോര്‍ അന്തിമോസ് എന്നീ മെത്രാപ്പോലീത്തായും, സഭാ ഭാരവാഹികളും, നിരവധി വൈദീകരും, അനേകം വിശ്വാസികളും വി. കുര്‍ബ്ബാനയിലും കബറിങ്കല്‍ നടത്തപ്പെട്ട ധൂപപ്രാര്‍ത്ഥനയിലും പങ്കെടുത്തു.

തുടര്‍ന്ന് 9.30 മണി മുതല്‍ വൈകീട്ട് 5.30 വരെ പുത്തന്‍കുരിശ് സെന്റ് പീറ്റേഴ്‌സ് & സെന്റ് പോള്‍സ് യാക്കോബായ സുറിയാനി പള്ളി വനിതാ സമാജത്തിന്റെ നേതൃത്വത്തില്‍ പ്രാര്‍ത്ഥനാ യോഗം നടന്നു. നിരവധി വൈദീകരും, വനിതാ സമാജം അംഗങ്ങളും പങ്കെടുത്തു. ഉച്ചയക്ക് 12.00 മണിയ്ക്ക് ഉച്ചനമസ്‌ക്കാരം നടന്നു.

വൈകീട്ട് 6.00 മണിയ്ക്ക് നടന്ന സന്ധ്യാപ്രാര്‍ത്ഥനയ്ക്ക് മലങ്കര മെത്രാപ്പോലീത്തായും പരി. എപ്പിസ്‌ക്കോപ്പല്‍ സുന്നഹദോസ് പ്രസിഡന്റുമായ അഭി. ജോസഫ് മോര്‍ ഗ്രീഗോറിയോസ് മെത്രാപ്പോലീത്ത, കണ്ടനാട് ഭദ്രാസനാധിപൻ അഭി. മാത്യൂസ് മോർ ഈവാനിയോസ് മെത്രാപ്പോലീത്ത എന്നിവർ നേതൃത്വം നല്‍കി. വന്ദ്യ കോറെപ്പിസ്‌ക്കോപ്പാമാരും, ബഹു. വൈദീകരും, നിരവധി വിശ്വാസികളും സംബന്ധിച്ചു.